Weeklikse Afrikaanse Landbou Nuusoorsig - 6 Julie 2022

Weeklikse Afrikaanse Landbou Nuusoorsig - Die Afrikaanse Nuus is die afgelope paar dae op AGRI NEWS NET geplaas, saam met nog ander artikels. 

Die produsenteprysindeks het in Mei vanjaar op ’n jaargrondslag met 19,3% toegeneem. Op ’n jaargrondslag het die prys van graankosse met 30,8% en die prys van vrugte en groente met 20,8% gestyg. “Die kombinasie van hoër koste om skuld te delg midde-in ’n rekordhoë insetkoste-omgewing sal voortgaan om aan produsente se winsmarges te vreet en kan daartoe lei dat diegene wat reeds finansieel in die knyp is, sal kies om die sektor te verlaat. “Die stygende brandstofpryse word op verskillende maniere van oes tot die verspreiding van produkte duidelik. Graanprodusente en logistieke maatskappye in die landbouwaardeketting sal die prysstygings voel aangesien bykans 80% van graan padlangs vervoer word. Die vee- en tuinboubedryf, met sitrus se uitvoerseisoen wat volstoom aan die gang is, sal ook geraak word ten opsigte van verspreiding landwyd en uitvoer.” Aan die verbruikersfront het die verbruikersprysindeks in die tweede kwartaal van vanjaar met 25 punte gedaal nadat dit in die eerste kwartaal met 13 punte verminder het. Verminderde besteding kan ’n demper op vraag en gevolglik produktepryse plaas ten spyte van insetkoste wat op hoë vlakke bly. Dit kan dus produsente se winsmarges onder druk plaas.

Suid-Afrikaners se geduld en liefde vir ons land word tans ernstig getoets met beurtkrag wat elke huishouding, sake-onderneming en groot industrie daagliks vir ure lank sonder elektrisiteit laat. Intussen styg brandstofpryse tot nuwe rekordvlakke met petrol en diesel teen R30 per liter wat nou na ‘n sterk moontlikheid begin lyk. Behalwe vir beurtkrag het elektrisiteitstariewe in Suid-Afrika die afgelope paar jaar sodanig gestyg dat Suid-Afrika se huidige energiekrisis nie meer net een van beskikbaarheid is nie, maar ook van bekostigbaarheid. Moderne boerderypraktyke steun swaar op elektrisiteit en boere sê die onlangse toename in beurtkrag ontwring hul boerderybedrywighede aansienlik. Pakhuise, pompstasies, besproeiing- en verkoelingstelsels en mengtoerusting is alles van kragvoorsiening afhanklik. Insetverskaffers kan ook nie na behore funksioneer sonder ʼn stabiele elektrisiteitsnetwerk nie. Agri SA sê boere rapporteer reeds geweldige verliese namate verwerkingsmasjinerie, besproeiingstoerusting en ander masjinerie skade ly en tot stilstand kom weens onderbrekings in kragtoevoer. Die impak van beurtkrag kring egter wyer uit as net die ooglopende. Christo van der Rheede, Agri SA se uitvoerende direkteur, is van mening dat beurtkrag ook voedselsekerheid en maatskaplike stabiliteit in gedrang bring. Beurtkrag dra by tot inflasie en kan tot gevolg hê dat boere minder aanplant, weens stygende koste en onderbreking in aanplantskedules. Beurtkrag verhoog die koste van produksie vir boere in ʼn tyd waarin Suid-Afrikaners deur verdere voedselprysstygings in die gesig gestaar word en onder ongekende ekonomiese druk verkeer. Dit veroorsaak meer risiko’s en onsekerheid.” Hy sê terwyl sommige boere die middele het om van die kragnetwerk af te beweeg, is die meeste nie daartoe in staat nie. Dit geld veral vir die mees kwesbare kleinskaal boere. Boere verbeur hul waterkwotas vir besproeiingsdoeleindes wanneer die krag af is – ʼn onverhaalbare verlies wat boerderye lamlê.

Matshela Koko, voormalige waarnemende uitvoerende hoof van Eskom, het Sondag op Twitter gesê dat André de Ruyter, uitvoerende hoof van Eskom, se tydperk as die land se kragbaas 'n ramp is. Hy het bygevoeg dat de Ruyter toegelaat is om sy mislukking vry te spring weens 'wit bevoorregting -Dit volg nadat de Ruyter die skuld van beurtkrag op dekades se agteruitgang en staatskaping by die kragmaatskappy geplaas het. “Ons moet hierdie wit bevoorregting by Eskom hanteer en wanneer dit klaar is, sal Eskom se prestasie ten goede verander," lui 'n Twitter-plasing deur Koko. "Van die 46 000 MW nominale kapasiteit is meer as 21 000 MW nie beskikbaar nie en niemand gee om nie. Allerhande verskonings word gebruik om wit bevoorregting te beskerm,” voeg Koko by. Kganki Matabane, uitvoerende hoof van die Black Business Council (BBC), sê dié sakeliggaam doen 'n beroep op de Ruyter om afgedank te word. 

Die minister van Polisie, Bheki Cele, het tydens ‘n gemeenskapsvergadering in Gugulethu op die Kaapse Vlakte sy humeur verloor en op ‘n verteenwoordiger van ‘n burgerregte-organisasie geskree om stil te bly en die saal te verlaat. Die voorval het gebeur nadat Ian Cameron van Action Society gesê het Cele respekteer nie die regte van mense wat met misdaad moet saamleef nie. Cameron het gesê Cele woon vergaderings by onder swaar polisiebegeleiding, terwyl Jan en Alleman nie daarop geregtig is nie. Cele was besig om vrae van gemeenskapslede te beantwoord, toe Cameron opgestaan het om op sy opmerkings te reageer. Cele het gesê Cameron kan hom niks van menseregte vertel nie en het op hom geskree om stil te bly en die saal te verlaat.ʼn Regering wat so voortstrompel ten spyte van goedbedoelde advies, die planne van menige kundige rolspelers ignoreer en wat afwysend reageer op grondige bevindinge kan nie anders as om dan verantwoordelik gehou te word vir die al groterwordende  breuk in vertroue tussen regering en die burgerlike samelewing nie.

Ons is in die tweede helfte van 2022- ons land is in krises en ons het werklike leiers nodig om hierdie land weer te kry waar dit was.  Ons mense wat waardes het en weet wat dit is om te bou en te werk en welvaart te skep moet nou saamstaan. Moenie afdaal na die vlak van die regering en sy meelopers nie. Moenie jou geloof verloor nie- ons kan hierdie land weer opbou. 

Landbou is die hoeksteen van Suid Afrika - voedselsekerheid was nog altyd daar- ons het van die beste landbouers in Suid Afrika- en ons opkomende boere doen net so goed. Dis tyd saamstaan - dit was lankal tyd. 

Ons Junior Landbouskrywers kompetiese sal eerdaags in aanvang neem. Hou gerus ons mediums dop . Ons begin ook eersdaags met 'n ander nuwe kompetisie. 

Nuusredakteur

Twitter