Weeklikse Afrikaanse Landbou Nuusoorsig - Die Afrikaanse Nuus is die afgelope paar dae op AGRI NEWS NET geplaas, saam met nog ander artikels. Nuusoorsig - 8 Junie 2022

Weeklikse Afrikaanse Landbou Nuusoorsig - Die Afrikaanse Nuus is die afgelope paar dae op AGRI NEWS NET geplaas, saam met nog ander artikels. 

Die jongste Africa Environment & Wildlife wys op navorsing deur twee Amerikaanse wetenskaplikes, Douglas en Jane Williamson, oor die afname in wildgetalle ná die oprigting van die Suidelike Buffelheining in1981. Die wildebeesbevolking in die Kalahari het binne twee jaar afgeneem van 300,000 tot net oor die 2,000. Net rondom die Xau-meer is 50,000 in een jaar dood.  Die geveg vir die oorlewing van die Okavango-delta, ’n delikate dun sluier lewe wat oor die woestynsand gegooi is deur die wonderwerk van die deltavloede, het reeds begin. Beesboere het onlangs byna daarin geslaag om ’n stuk grond van 4,230 km² wat regdeur ’n tak van die delta sny, op te eis.Die vloedvlaktes word kort-kort aan die brand gesteek vir vroeë groen weiding. Beeste ding mee met die waterkoedoe (sitatunga) en seekoeie, asook met buffels, sebras en wildebeeste vir gras. As die vloedplein oorbewei word, sal die jaarlikse vloede nie deur plantegroei getem kan word nie en die sensitiewe gebied tydens die droë seisoen in ’n woestynland omgeskep word.

TLU SA het Dinsdag gesê Suid-Afrika het nou meer as ooit jong boere broodnodig vir vooruitgang. Volgens die organisasie kan die landboubedryf nie sonder jong boere bestaan nie en het die bedryf reeds die afgelope paar jaar gegroei danksy die deursettingsvermoë van hierdie boere. Kommer is onlangs uitgespreek ná afloop van ’n studie wat bevind het dat die jonger boere – wat tans tussen 30 en 45 jaar oud is – meer waarskynlike kandidate is om binne die volgende tien jaar uit die landboubedryf te tree. Uit die navorsing blyk dit dat sowat 20% (’n vyfde) van die land se produsente beplan om die mark binne die volgende dekade te verlaat. Diegene wat die mark behoort te verlaat weens ouderdom of armoede en dit nié doen nie, blyk egter ’n groter kwessie te wees. Die navorsing het verder aan die lig gebring dat faktore soos finansiële probleme, ’n gebrek aan betroubare arbeid, onsekerheid aangaande die grondhervormingsbeleid en kommer oor landelike veiligheid die besluit om uit te tree dryf.

Daar is vanjaar al plaaslike sojabone vir uitvoer beskikbaar en een van die moontlike uitvoerbestemmings is China. Suid-Afrika voldoen aan al die protokolvereistes vir dié uitvoer en daar word net gewag op die finale goedkeuring, sê mnr. Corné Louw, hoof van toegepaste ekonomie en lededienste by Graan SA. Volgens die jongste oesskattings het Suid-Afrika hierdie seisoen die grootste sojaboonoes in die geskiedenis van 1,93 miljoen ton en die tweede grootste sonneblomoes van 963 000 ton. “Die verwagting is dat Suid-Afrika van 850 000 ton tot 920 000 ton sonneblom en 1,55 miljoen ton sojabone sal kan pers,” sê Louw.

Daar sal sowat 380 000 ton sojabone beskikbaar wees vir uitvoer. Louw sê in die lig van ’n groot verwagte toename in aanplantings in die nuwe seisoen sal daar volgende jaar heelwat meer beskikbaar wees vir uitvoer en daarom word hard gewerk aan uitvoermarkte en die logistiek vir uitvoer. Teoreties is Suid-Afrika se parskapasiteit vir sojabone nou sowat 1,8 miljoen ton ná uitbreidings van meer as R2 miljard en vir sonneblom is die kapasiteit sowat 900 000 ton.

Ons Junior Landbouskrywers kompetiese sal eerdaags in aanvang neem. Hou gerus ons mediums dop . Ons begin ook eersdaags met 'n ander nuwe kompetisie. 

Nuusredakteur

Twitter